चितवन – कलैया – बाराको सदरमुकाम कलैयामा फागुन ९ गतेदेखि कलैया टी–२० मेयर कप क्रिकेट प्रतियोगिता हुने भएको छ । कलैया उपमहानगरपालिकाको मुख्य सहयोगमा कलैया क्रिकेट क्लबले टी-२० मेयर कप क्रिकेट प्रतियोगिता आयोजना गर्न लागेको हो ।
कलैयाको सिद्धेश्वरस्थित खेल मैदानमा हुने प्रतियोगितामा नेपाल र भारतका ६ वटा टिमले भाग लिने आयोजकले जनाएको छ । बाराको कलैया, पर्साको वीरगन्ज, चितवन र मकवानपुर तथा भारत बिहारको बेतिया र मोतिहारी क्रिकेट क्लबले भाग लिने आयोजक कलैया क्रिकेट क्लबलका अध्यक्ष तसिरुद्दिन मन्सूरले पत्रकार सम्मेलनमा जानकारी गराए ।
प्रतियोगितको उपाधि विजेता टिमलाई नगद ६० हजार सहित ट्रफी र उपविजेता टिमलाई नगद ३० हजार रुपैयाँसहित ट्रफी प्रदान गरिने छ । पत्रकार सम्मेलनमा कलैया उपमहानगरपालिकाका मेयर विनोद साहले प्रतियोगिताको विजेता र उपविजेता टिमलाई प्रदान गरिने ट्रफी सार्वजनिक गरेका थिए ।