काठमाडौँ – शहीद स्मारक ए डिभिजन लिग फुटबलमा जाउलाखेल युथ क्लबले मनाङ मर्स्याङ्दीमाथि सानदार जित हात पारेको छ र, लिगको शीर्ष स्थानमा उक्लिएको छ । शनिबार च्यासल मैदानमा भएको खेलमा जाउलाखेलले मनाङमाथि ३–० को जित निकालेको हो । खेलमा जाउलाखेलले चौथो मिनेटमै मसोअबिको गोलबाट आग्रता लिएको थियो । बाँकी दुई गोल भने इन्जुरी टाइममा भयो ।
निर्धारित ९० मिनेटको खेल सकिएपछि थपिएको पाँचौं मिनेटको पहिलो मिनेटमा फोफानाले गोल गरे । अन्तिम मिनेटमा मसोअबिले व्यक्तिगत दोस्रो गोल गरेपछि जाउलाखेलले महत्वपूर्ण तीन अंक हात पार्यो । यो जितसँगै जाउलाखेल ९ खेलबाट १७ अंकसहित शीर्ष स्थानमा उक्लिएको छ । हारसँगै शीर्ष स्थानमा उक्लिने मौका गुमाएको मनाङ १५ अंकका साथ तेस्रो स्थानमा छ ।