काठमाडौं – शहीद स्मारक ए डिभिजन लिगमा साविक विजेता मच्छिन्द्र फुटकल क्लबले थ्रीस्टार क्लबलाई १–० ले पराजित गरेको छ । शनिबार च्यासल मैदानमा सम्पन्न खेलमा मच्छिन्द्रलाई जिताउन खेलको १०औं मिनेटमा युटा सुजुकीले गोल गरे ।
पेनाल्टी क्षेत्र भित्र अफिजको कडा प्रहारलाई थ्री स्टारका गोलकिपर पूर्ण चेम्जोङले बचाए पनि रिबाउन्ड बललाई युटाले पोस्टको दिशा दिएका थिए । बाँकी समयमा थ्री स्टारले खेलमा फर्किने केही अवसर बनाए पनि सफल हुन सकेन र मच्छिन्द्र अंक जोड्न सफल भयो ।
यससँगै थ्री स्टारले लगातार छैठौं खेलमा पनि जित बिहीन बनेको छ । शनिबारको जितसँगै मच्छिन्द्र तालिकाको तेस्रो स्थानमा उक्लिएको छ । १७ खेलबाट ३० अंक जोडेर मच्छिन्द्र तेस्रो स्थानमा पुग्दा समान खेलबाट २५ अंक बनाएको थ्री स्टार चौथो स्थानमा छ ।