काठमाडौं – शहीद स्मारक ए डिभिजन लिग फुटबलमा आफ्नो १८औं चरणको खेलमा हिमालयन शेर्पा क्लब र संकटा क्लबले बराबरी खेल्दै अंक बाँडेका छन् । त्रिपुरेश्वस्थित दशरथ रंगशालमा भएको खेलमा ५० औं मिनेटमा लिएको अग्रता जोगाउन नसक्दा हिमालयन शेर्पाले संकटासँग १–१ बराबरी खेलेको हो ।
विश्वास श्रेष्ठको कर्नरमा मेनुयल नानाले गोल गरेपछि खेलमा हिमालयन शेर्पाले अग्रता लिएको थियो । तर ७४औं मिनेटमा पेनाल्टीमार्फत गोल गर्दै संकटाले बराबरी गर्यो । पोष्टतर्फ अगाडि बढाउँदै गरेका आयुष घलानलाई मेनुयल नानाले पेनाल्टी बक्समा फाउल गर्दा संकटाले पेनाल्टी पाएको थियो । जसलाई आयुष घलानले सदुपयोग गर्दै खेल १–१ बराबरी गरेका हुन् ।
खेलमा अंक बाँड्दै हिमालयन शेर्पा क्लब नवौं स्थानमा उक्लिएको छ । १८ खेलमा ५ जित, ७ हार र ६ बराबरीसहित हिमालय शेर्पाले २२ अंक जोडेको छ भने संकटा क्लब आजको बराबरीसँगै समान १८ खेलमा ५ जित ६ हार र ७ बराबरी सहित २१ अंक जोड्दै ११ औं स्थानमा कायम छ ।