काठमाडौं – शहीद स्मारक ए डिभिजन लिगमा रेलिगेसन क्षेत्रको रहेको एफसी खुमलटारले हिमालयन शेर्पा विरुद्ध पुनरागमन जित निकाल्दै महत्वपूर्ण ३ अंक जोडेको छ । पुरेश्वरस्थित दशरथ रंगशालामा सोमबार भएको खेलमा खुमलटारले हिमालयन शेर्पा क्लबलाई २-१ ले हरायो ।
खुमलटारको जितमा मेसुके ओलुमोउ र स्टेफन बिनोङले एक एक गोल गरे । हिमालयनका मानुएल एग्योमाङले एक गोल फर्काए । खेलको छैटौं मिनेटमा मानुएलले गोल गर्दै हिमालयनलाई सुरुवाती अग्रता दिलाएका थिए । तर १७ औं मिनेटमा खुमलटारका मेसुकेले गोल गर्दै खेल १-१ को बराबरीमा ल्याए ।
खेलको ७६ औं मिनेटमा स्टेफन विनोङले गोल गर्दै खुमलटारलाई २-१ को जित दिलाए ।सातौं जित निकालेको खुमलटारले २२ खेलमा २४ अंक जोडेको छ र पूछारमै छ । खुमलटारले जितपछि रेलिगेसन जोनको अर्को टोली फ्रेण्ड्ससँग अंक बराबरी गरेको छ । हिमालयन शेर्पाको २२ खेलमा २९ अंक छ र आठौं स्थानमा रहेको छ ।