काठमाडौँ – ह्यारी केनले इंग्ल्याण्डका लागि आफ्नो एक सयौं खेलमा दुई गोल गरेका छन् । केनकै दुई गोलमा इंग्ल्याण्डले यूईएफए नेसन्स लिगअन्तर्गत लिग बी को समूह दुईमा फिनल्याण्डलाई २-० ले पराजित गरेको छ । घरेलु मैदान वेम्वलीमा भएको खेलमा केनले दुवै गोल दोस्रो हाफमा गरेका थिए । पहिलो हाफमा फिनल्याण्डले इंग्लिस टोलीलाई गोलरहित बराबरीमा रोकेको थियो ।
तर, दोस्रो हाफमा केन चम्किए ।५७औं मिनेटमा केनले ट्रेन्ट अलेजान्डर आर्नोल्डको पासमा गोल गर्दै इंग्ल्याण्डलाई अग्रता दिलाए । त्यसपछि ७६औं मिनेटमा मादुएकेको पासमा केनले व्यक्तिगत दोस्रो गोल गरे । राष्ट्रिय टिमका लागि एकसयौं खेलमा दुई गोल गर्ने केन पहिलो खेलाडी समेत बनेका छन् ।
उनले आफ्नो ६७औं र ६८औं अन्तर्राष्ट्रिय गोल गरेका हुन् । केन इंग्ल्याण्डका लागि एक सयौं खेलमा गोल गर्ने भने तेस्रो खेलाडी बने । यसअघि वायन रुनीले २०१४ मा स्लोभेनिया र बबी चार्लटनले १९७० मा उत्तरी आयरल्याण्डविरुद्ध एक सयौं खेलमा गोल गरेका थिए ।
केनले फिनल्याण्डविरुद्ध दुई गोल गरेपछि आफूले मिलवाल, नर्विच र लेस्टरमा लोनमा हुँदा सय खेल खेल्नेबारे नसोचेको बताए । नेसन्स लिगमा दोस्रो जित हात पारेको इंग्लयाण्ड लिग बी को समूह २ मा ६ अंकसहित दोस्रो स्थानमा छ । दुई खेल नै जितेको ग्रीस गोल अन्तरका आधारमा अघि रहँदै शीर्ष स्थानमा छ । पहिलो खेलमा फिनल्याण्डलाई हराएको ग्रीसले आयरल्याण्डलाई हराउँदै लगातार दोस्रो जित हात पारेको हो ।